Categoría: Novas

Xa está aberto o prazo para inscribirese no Mercado ECO&ART que, por terceiro ano consecutivo, se celebra na Praza Roxa de Santiago de Compostela. A iniciativa está organizada por APEGA, a asociación Nonéomesmo e Santiago Centro, coa colaboración do CRAEGA e do Concello de Santiago.

Preto de corenta expositores e un cento de marcas, na súa maior parte procedentes de Galicia, participan desde mañá xoves no Mercado Compostela Eco 2017. A feira abrirá as súas portas na Praza Roxa ata o próximo domingo e en horario interrompido de 11 a 21 horas, e mostrará os mellores produtos ecolóxicos certificados polo Consello Regulador da Agricultura Ecolóxica de Galicia (CRAEGA).

A Asociación de Produtores Ecolóxicos de Galicia (APEGA) e a Fundación Santiago Centro, Área Comercial, organizan por segundo ano consecutivo o Mercado, ao que acoden produtores de horta fresca, tendas de produtos ecolóxicos e empresas que elaboran desde marmeladas a licores, pasando polas empanadas, o viño e a cervexa, derivados da castaña, carne de vacún, queixo, aceite, repostería e panadería, mel ou produtos de cosmética natural.

Trátase dunha aposta pola dinamización do Ensanche nunhas datas nas que veciños e visitantes enchen as rúas para celebrar a Ascensión. En consecuencia, a feira leva aparellado un completo programa de obradoiros para nenos e maiores, conferencias e xornadas de xogo. Degustacións de alimentos ecolóxicos, presentacións de produtos e xornadas divulgativas completan a proposta.

TAPAS ECOLÓXICAS

No Ensanche segue activa, ademáis, a Ruta EcoGastro de tapas elaboradas con alimentos ecolóxicos certificados, unha iniciativa na que participan 17 locais e na que colabora a Asociación de Empresarios de Hostalería de Santiago. Por cada tapa obtense, ademais, un boleto de regalo directo con descontos no Mercado Compostela Eco.

O Ensanche de Compostela vivirá unha semana chea de actividade con motivo das Festas da Ascensión e do Mercado Compostela Eco de produtos ecolóxicos certificados. En paralelo á feira celebraranse múltiples obradoiros para nenos e maiores, conferencias e xornadas de xogo. Ademais, quen se achegue á zona moderna de Santiago no Día Grande da Ascensión poderá gozar na Praza Roxa e en Ramón Cabanillas de polbo, ofrecido polos hostaleiros da zona.

Durante todo o Mercado terán presenza as degustacións de alimentos ecolóxicos certificados no propio pavillón no que se celebra a feira. Varios dos expositores farán, ademais, presentacións públicas de produtos como empanadas, viño ou cogomelos. Dentro da programación de actividades ofrécense varias pensadas para os máis pequenos: o xoves, o sábado e o domingo haberá obradoiros de reciclaxe e de cultivo; e o venres e o sábado xogos de rúa a cargo do Centro Sociocultural e Xuvenil O Ensanche. O domingo, con motivo do Día Internacional do Xogo, prográmanse actividades específicas para bebés e nenos ata os 8 anos no centro Gaia dos Nenos.

Nenos e adultos poderán aprender a recoñecer plantas aromáticas e medicinais para despois empregalas en cosmética natural; a cultivar vexetais a través da técnica xaponesa das bolas Fukuoka; ou a cociñar receitas macrobióticas.

O programa divulgativo tamén é extenso. O Centro Sociocultural do Ensanche acollerá o sábado o Día de Apega, durante o cal a Asociación de Produtores Ecolóxicos Galegos, organizadora do Mercado xunto con Santiago Centro, presentará iniciativas como a súa Gardería de sementes (mediante a que se quere preservar as especies vexetais autóctonas cultivándoas) ou a campaña Non é o mesmo (para visibilizar o traballo dos pequenos produtores ecolóxicos locais). Nese escenario ofreceranse charlas sobre o traballo da Misión Biolóxica de Galicia ou a importancia da alimentación para a fertilidade.

O programa e horarios poden coñecerse na web de Santiago Centro, www.santiagocentro.gal.

POLBO NO DÍA GRANDE DA ASCENSIÓN

Por outra banda, locais de hostalería da rúa Ramón Cabanillas e a Praza Roxa uniranse para ofrecer un aliciente máis para visitar o Ensanche o xoves. No Día Grande da Ascensión instalarán en ambas localizacións cocedeiros de polbo, co ánimo de atraer a composteláns e visitantes na principal xornada das festas máis compostelás do ano.

Os locais de hostalería do Ensanche de Santiago converteranse entre os días 20 e 28 de maio nun gran escaparate da gastronomía ecolóxica galega coa celebración da segunda Ruta EcoGastro de petiscos elaborados con produtos ecolóxicos certificados. A Asociación de Produtores Ecolóxicos de Galicia, APEGA, e a Fundación Santiago Centro, Área Comercial, organizan esta cita en colaboración coa Asociación de Empresarios de Hostelería de Santiago e Comarca como forma de mostrar ao público as posibilidades gastronómicas dos alimentos máis saudables.

Os bares e restaurantes participantes nesta Ruta EcoGastro elaborarán tapas, racións e pratos con prezos arredor dos 3, 9 e 12 euros, respectivamente. As propostas culinarias estarán elaboradas con alimentos certificados polo Consello Regulador da Agricultura Ecolóxica de Galicia (CRAEGA) ou equivalentes noutras comunidades.

A inscrición para locais de hostalería interesados atópase aberta. Para máis información, poden dirixirse ao mail info@compostelaeco.com. A organización facilitará aos establecementos participantes dun listado de provedores nos que facerse cos ingredientes necesarios.

A Ruta EcoGastro coincidirá no seu tramo final coa segunda edición de Compostela ECO, o Mercado Ecolóxico que se celebrará de novo na Praza Roxa de Santiago de Compostela entre os días 25 e 28, dedicado a este tipo de produtos. Esta cita está dirixida exclusivamente a produtores con certificación, sexan de horta fresca, tendas ou elaboradores, transformadores ou envasadores.

Estes dous eventos coinciden coa fin de semana das Festas da Ascensión, as máis populares da cidade e unhas datas nas que milleiros de persoas visitan a capital de Galicia. Levarán aparelladas accións de divulgación, formación e debate sobre produción ecolóxica, alimentación e vida sa; e música e actividades lúdicas para nenos e adultos. Atópanse enmarcadas nas actividades de primavera no Ensanche que promove Santiago Centro, entre as que ademais se contan o desfile Moda a pé de rúa do día 19 de maio; a Festa do Comercio do día 27; e o Mercado Compostela ART, de artesanía, xa para o mes de xuño.

A Fundación Santiago Centro, Área Comercial, presentou esta mañá no Concello de Santiago unha serie de accións destinadas a dinamizar as rúas e prazas do Ensanche de Santiago, atraendo a veciños e turistas. As actividades coinciden en parte coa celebración das Festas da Ascensión. Na rolda de prensa estiveron presentes a concelleira de Comercio, Marta Lois; o presidente de Santiago Centro, José María Fernández; e o presidente da Asociación de Produtores Ecolóxicos Galegos (APEGA) e patrón da Fundación, Xosé Manuel Durán.

“Queremos que o Ensanche, tanto os seus comerciantes coma os seus veciños, se impliquen a fondo na celebración más compostelá do ano”, explicou Fernández. O éxito das actividades no 2016 animou á fundación a repetir e aumentar programación este exercicio, afirmou.

Estas son as actividades que levará a cabo Santiago Centro nos meses de maio e xuño dentro da programación Ensanche Primavera 2017:

-Desfile Moda a Pé de Rúa (venres 19 de maio, rúa Xeneral Pardiñas). Desfile ao aire libre de moda, calzado, complementos, coidado persoal, tecnoloxía… no que participan os establecementos do Ensanche.

-Ruta EcoGastro 2017 (do 20 ao 28 de maio). Promovida en colaboración coa Asociación de Hostalaría de Santiago e Comarca, trátase dunha ruta de tapas realizadas con alimentos ecolóxicos certificados, en establecementos hostaleiros do Ensanche.

–Compostela Eco 2017 (do 25 ao 28 de maio na Praza Roxa). Mercado de alimentación ecolóxica certificada, convocado conxuntamente pola Asociación de Produtores Ecolóxicos de Galicia, APEGA, e a Fundación Santiago Centro. Exposición comercial cuns vinte expositores de produtores de proximidade, tendas, elaboradores, transformadores e envasadores. Actividades de divulgación.

-Festa do Comercio 2017 (sábado 27 de maio). Os establecementos do Ensanche saen á rúa con ofertas e propostas lúdicas e de animación.

-Compostela ART 2017 (1 ao 20 de xuño, Praza Roxa), mercado de artesanía e obxectos singulares.

A Asociación de Produtores Ecolóxicos de Galicia, APEGA, e a Fundación Santiago Centro, Área Comercial, organizan para os próximos días 25 a 28 de maio a segunda edición de Compostela ECO, o Mercado Ecolóxico que se celebrará de novo na Praza Roxa de Santiago de Compostela. O evento coincide coa fin de semana das Festas da Ascensión, as máis populares da cidade e unas datas nas que milleiros de persoas visitan a capital de Galicia. Para poder participar como expositor, os interesados deberán formalizar antes das 22:00 do día 30 de abril de 2017 unha solicitude na web www.compostelaeco.com.

A mostra diríxese exclusivamente a produtos con certificación do Consello Regulador da Agricultura Ecolóxica de Galicia (CRAEGA) ou dun organismo correspondente, se se trata de produtos de fóra da Comunidade. Participarán como expositores produtores de horta fresca sen RSI; establecementos de venda polo miúdo (tendas); ou produtores, elaboradores, transformadores ou envasadores con RSI.

Ademais da exposición comercial na Praza Roxa, Compostela ECO 2017 incluirá a segunda edición da Ruta EcoGastro, para a que se conta coa colaboración da Asociación de Hostalaría de Santiago e Comarca; e máis accións de divulgación, formación e debate sobre produción ecolóxica, alimentación e vida sa. Haberá tamén actividades lúdicas para nenos e adultos, coa intención de dinamizar as rúas e prazas do Ensanche nunhas datas de especial afluencia de visitantes; e de difundir as vantaxes do produto ecolóxico como parte dun estilo de vida saudable e respectuoso co medio natural.

Vinte e cinco produtores de proximidade, tendas e envasadoras galegas participaron este ano nos Mercados Compostela Art&Eco, dándose cita na Praza Roxa nunha mostra de alimentación ecolóxica composta exclusivamente por produtos certificados. Durante os catro días ofréceuse produto fresco de horta, queixos, viños, licores e cervexas, café, doces, conservas vexetais… Durante a feira levouse a cabo na carpa desta Feira Ecolóxica Labrega unha degustación de pratos elaborados con alimentos ecolóxicos certificados, ofrecida polo Consello Regulador da Agricultura Ecolóxica de Galicia. Á cita asistiron o seu director, Javier García; e Xosé Manuel Durán Orús, da Asociación de Produtores Ecolóxicos de Galicia, APEGA.

En paralelo, unha exposición de artesanía galega de autor levouse a cabo na Carreira do Conde. Os 30 expositores, seleccionados pola calidade das súas creacións e pola diversidade dos seus produtos, ofreceron complementos, bixutería e xoiaría, artesanía en coiro, escultura e cerámica… Obradoiros, música e unha ludoteca xigante completaron a programación.

A Fundación Santiago Centro, Área Comercial presentou onte o Mercado Compostela Art&Eco 2016, que organiza para os días 5 a 8 de maio en colaboración coa Asociación de Produtores Ecolóxicos de Galicia (APEGA) e A Cesta da Saúde. Na presentación estiveron presentes Xosé Manuel Durán, en representación destas dúas entidades; José María Fernández, presidente de Santiago Centro; e o seu secretario, Delmiro Prieto.

A iniciativa busca dinamizar o comercio do Ensanche compostelán atraendo o numeroso público que acude durante eses días ás Festas da Ascensión. Compostela Art&Eco componse de dous mercados simultáneos, un de arte e artesanía situado na Carreira do Conde e outro de produto ecolóxico certificado, que se celebrará na Praza Roxa.

A presentación logrou boa repercusión nos medios de comunicación. Entre as pezas que se poden consultar on line están esta noticia na Cadena Ser Galicia e a información elaborada por Correo TV para o seu informativo.