Xa está aberto o prazo para inscribirese no Mercado ECO&ART que, por terceiro ano consecutivo, se celebra na Praza Roxa de Santiago de Compostela. A iniciativa está organizada por APEGA, a asociación Nonéomesmo e Santiago Centro, coa colaboración do CRAEGA e do Concello de Santiago.
Neste primeiro semestre de 2018 a cita convértese nun mercado quincenal que se inicia o sábado día 12 de maio, coincidindo coas Festas da Ascensión, e remata a finais do mes de xullo. O Mercado reunirá produto ecolóxico certificado e artesanía de autor, complementándose con diversas actividades. A participación é gratuíta para expositores.
Para poder participar cómpre cubrir un formulario de inscrición. Ao formulario podes acceder seguindo o enlace que figura na cabeceira das Bases de Participación.