A FEIRA

Preto de corenta expositores e un cento de marcas participan este ano na segunda edición do Mercado Compostela ECO, organizado pola Asociación de Produtores Ecolóxicos de Galicia, APEGA, e a Fundación Santiago Centro, Área Comercial para os próximos días 25 a 28 de maio. O Mercado Ecolóxico celébrase de novo na Praza Roxa de Santiago de Compostela e coincide coa fin de semana das Festas da Ascensión, as máis populares da cidade e unas datas nas que milleiros de persoas visitan a capital de Galicia.

A mostra diríxese exclusivamente a produtos con certificación do Consello Regulador da Agricultura Ecolóxica de Galicia (CRAEGA) ou dun organismo correspondente, se se trata de produtos de fóra da Comunidade. Participarán como expositores produtores de horta fresca sen RSI; establecementos de venda polo miúdo (tendas); ou produtores, elaboradores, transformadores ou envasadores con RSI.

Ademais da exposición comercial na Praza Roxa, Compostela ECO 2017 incluirá a segunda edición da Ruta EcoGastro, para a que se conta coa colaboración da Asociación de Hostalería de Santiago e Comarca; e máis un amplo programa de accións de divulgación, formación e debate sobre produción ecolóxica, alimentación e vida sa. Haberá tamén actividades lúdicas para nenos e adultos, coa intención de dinamizar as rúas e prazas do Ensanche nunhas datas de especial afluencia de visitantes; e de difundir as vantaxes do produto ecolóxico como parte dun estilo de vida saudable e respectuoso co medio natural.